Ս.թ. նոյեմբերի 18-ին ՀՀ ԳՆ ՍԱՊԾ նիստերի դահլիճում տեղի ունեցավ ասուլիս` նվիրված 2014թ.-ի նոյեմբերի 12-ից ՌԴ մսամթերքի արտահանման հարցերին:
Բանախոսը Ծառայության աշխատակազմի անասնաբուժության տեսչության պետ Հովհաննես Մկրտչյանն էր:
Նա ներկայացրեց ՌԴ մսամթերքի արտահանման թույտվություն ստացած 11 ընկերությունների ցանկը և նշեց, որ ևս 3 ընկերության ընդգրկումն այդ ցանկում քննարկման փուլում է:
Բանախոսն անդրադարձավ նաև այն հարցին, թե ինչու էր արգելվել մսամթերքի արտահանումը ՌԴ, ինչպես է թույլատրվել նախ՝ 2009թ.-ից ձուկ-ձկնամթերքի արտահանումը, ապա՝ 2010թ.-ից՝ կաթնամթերքի արտահանումը, և այժմ՝ 2014թ.-ից՝ մսամթերքի արտահանումը: Նա նշեց, որ այժմ Ծառայության պետի և աշխատակազմի կողմից աշխատանքներ են կատարվում նաև ՀՀ-ից ՌԴ թռչնամսի արտահանման թուլյտվության ձեռքբերման ուղղությամբ:
Հովհաննես Մկրտչյանը հորդորեց ԶԼՄ ներկայացուցիչներին զգույշ լինել կենդանիների հիվանդությունների անվանումների օգտագործման ժամանակ և հաղորդագրություն տարածելուց առաջ քննարկել Ծառայության համապատասխան ստորաբաժանումների հետ, քանի որ ոչ ստույգ տեղեկատվություն պարունակող նյութը կարող է լուրջ վնաս հասցնել մեր երկրից տարբեր երկրներ արտահանում իրականացնելու գործընթացներին:
Հովհաննես Մկրտչյանը հակիրճ ներկայացրեց այն չափանիշները, որոնցով ընտրվել են վերոնշյալ 11 ընկերությունները (հումքի անվտանգություն, փաթեթավորում, մակնշում, տեղափոխման պայմաններ):
Հովհաննես Մկրտչյանը տեղեկացրեց նաև, որ առաջիկայում կկազմակերպվի հանդիպում արտահանման թույլտվություն ստացած տնտեսավարող սուբյեկտների ներկայացուցիչների հետ, որի ընթացքում հայրենական արտադրողներին կներկայացվեն արտահանվող մսամթերքին ներկայացվող Մաքսային միության պահանջները և արտահանման սերտիֆիկատի տրամադրման գործընթացը:
Բանախոսը հավաստեց, որ Հայաստանի Հանրապետությունն ունի ամսական մոտ 3000 տոննա մսամթերքի արտահանման պոտենցիալ՝ այս պահի դրությամբ առանց ներքին շուկայում գների վրա ազդեցություն թողնելու:
Հովհաննես Մկրտչյանը, ամփոփելով ասուլիսը, հակիրճ անդրադարձ կատարեց նաև ՀՀ-ում մսի վաճառքի շուկայում տիրող իրավիճակին և վստահեցրեց, որ հաշվի առնելով նախատոնական ժամանակաշրջանում մսի անվտանգության հետ կապված ռիսկերի հնարավոր ավելացումը՝ այդ օրերին վերահսողությունը կուժեղացվի: